Amos等一番努力，終於救出政務屍和財政屍，還有早前新加入的爆粗雅各。但正駕車離場之際，以曼克頓和萬事達為首的地產大軍，卻強行登上車頂，意圖死纏爛打。單數車頂人頭，敵我雙方加埋八個，情景猶如坐觀光巴士，快樂暢遊玩香江。

但坐這架觀光巴絕不輕鬆，因為帕卡瘋狂扭軚，使貨車左右搖擺。未出公園，已揈甩一個地產佬；再踩入寶輪街，然後『之』字行大路，又再揈多一件走。沿路車輛走避不及，有的撞上行人路，有的成架反轉。司機紛紛落車叫罵，「喂！你點X樣揸車㗎？」、「X你老母臭X！」之聲不絕。所幸除了兩個地產佬，便無途人受傷矣。

街道不長，很快就到達盡頭。帕卡於是大喝一聲：「坐穩啦！」同時剎掣扭軚再踩油，貨車便甩尾轉左，停車打燈都費事，瞬間就轉入荔枝角道。大路車輛不料有車轉入，收掣不及之下，三車連橫相撞，炒埋一碟。唯獨一架本田車突圍而出，緊緊跟在貨車背後。

細看本田車裡頭，它載着的不是別人，而是御龍、君凱和尚南天—他們在深水埗一戰失利，以致手下紛紛逃走，剩下三個繼續上路，跟蹤到美孚這裡。

君凱坐在後排，看見貨車在前頭，便驚訝大叫：「看！車頂上的不就是……美孚雙煞—曼克頓和萬事達嗎？」尚南天坐其旁邊，看車頂確是熱鬧，都一樣大叫驚訝：「世人都說：美孚雙煞，人見人怕！他們都出動的話，Metal Church那班友仔實死無生！」

「那麼三百萬獎金，豈不是會……」君凱怪叫。

「落入他們手中？不行！要快上！」尚南天怪叫。

兩人一唱一和，講到膽顫心驚。但御龍繼續駕車，依然淡定有錢剩：「嘿，大驚小怪！區區美孚雙煞，殺不了他們，也奪不了獎金的！」君凱尚南天聽罷，不禁齊聲訝異：「御龍兄、你敢肯定？」

「信我吧！靜觀其變，看清楚形勢再出手吧！」

「真的？……我們信你的了！」

二人猶豫半晌，還是決定相信御龍……信住一半先啦。是以他們並未出手，只一味繼續跟蹤。

……

回看貨車。只見車頂剩下六個：這邊有Amos和插水王；敵方有曼克頓、萬事達和兩名手下。他們個個功力高，馬步穩，任你貨車左翻右騰，都依然站立得穩。但為免拋出車外，雙方都紥穩馬步，絲毫不敢貿然出手。

雙方無動靜之下，帕卡亦稍為收歛，不再『之』字行車。但貨車衝上斜路，再上葵涌道公路，車速隨即颷升三十，要站穩亦非易事。當中地產佬A稍稍鬆懈，便幾乎成件仆低。插水王見大好機會。還不乘勢出招發難？

「Oh chance! 『學警出更 第三集 獵鯊行動拳』！」

又想進攻，又唔想埋身，用遠攻就最好不過。地產佬A掛住企穩，但見猛招將至，只得呆呆怪叫：「糟……」和監生硬食一記，成件飛出車外。地產佬B見狀一愕：「可….可惡！看我的！」又驚又怒之下，有理無理，都要出招搵仇報。只可惜未及出招，Amos已橫身閃出，亂棍反扑其腿：

「『十架思典 第二十四章 虱災』！」

『虱災』力度不猛，旨在令人周身痕，但已教地產佬B抱腳叫苦：「嘩！救命……」平衡頓失，又是跌到路上矣。

如此兩手下敗走，車頂便只剩四個，局勢變成二對二，實在公平過公平。但Amos和插水王出招在先，難免露出些微破綻。曼克頓和萬事達趁此機會，當然要出招發難：

「好機會！上呀！『樓按神功 十成按揭 三按拳』x2！」

正所謂：二人同心，其利斷金。兩人步伐一致，招式一致，目標也是一X致—Amos價錢高，自然先擒下要緊。Amos不料被夾攻，暗叫大驚：「什麼？兩個一齊來？」以他功力，應付一個還可以，兩個就極之勉強。就算雙棍齊舞，恐怕也難以久守。不過插水王人在就近，又怎會給你輕易得手？當然要趁無人看管，絕招從後包抄：

「Hey man you forgot me?『學警出更 第三集 廉政追緝令』x2！」

一雙手刀如利剪猛劈，這邊劈中曼克頓左頸，那邊劈中萬事達右頸，人人有份，永不落空。若是尋常對手，分分鐘就係咁大。但斬落美孚雙煞頸項，竟是劈之不入，反被對方護身勁震開：「Shit! 好強的護身勁……」突襲不成，反而露出破綻，本應大叫陷家鏟。但美孚雙煞你眼望我眼，猶豫半晌，竟是互問對方……

「喂！不是你去招呼他嗎？」

問題一出，又是你眼望我眼，互相猶豫多半晌。經此一拖，插水王已經穩住身形，準備隨時再攻。萬事達錯失良機，不禁惱羞成怒：

「豈有此理！不過……但若快快擺平死差佬，再回頭宰掉什麼亞摩司，就能獨得百五萬，發過豬頭呀哈哈！」

決定轉移目標，於是便重鎚出擊，左一招『三按拳』，右一招『四按拳』，攻勢一浪接一浪。但插水王經驗不淺，早在觀塘見識此招，專注防守之下，尚能力保不失：「What the Fxxk！這傢伙果然不惹小！」之不過守得一時，守不到一世。若無法出奇制勝，遲早還是要硬食按揭，或是被監生打落車。

幸得他頭腦精晴，無意瞄到Amos大戰曼克頓，正打個難分難解，便突然心生一計，於是放聲高呼：「Ok……蛇王周支持住，唔好死呀！」故意發放假消息，果然令萬事達一窒：「頂……頂你不不不不是吧？咁快？」生怕目標死在別人手，當然要急急制止。豈料一個回頭，卻見Amos越戰越勇，離死相差九丈遠，才曉得自己中伏：「仆……仆街死差佬，你跣我？」

「唔跣你，唔通跣自己友？傻仔eat this! 『轟天炮拳』！」

插水王看準一剎機會，衝前上勾拳猛抽，一氣轟中萬事達肚腹。這記重拳勁力集中，絕非剛才的手刀可比。就算強如萬事達，也得抱腹叫抽搐：「頂你……」成件被剷上半空。

插水王一招得手，叉住腰洋洋得意：「Bye bye! 將打你落車，慳水又慳力呀！」不過他又開心得太早。因為萬事達凌空翻騰三周半，借勢飛開八丈遠，落在後上的巴士車頂。紥馬穩住身形，又跳上另一架巴士，最後彈跳返回貨車頂，回塘又擺個靚咅士：「想買甩我？無咁易！」

「Oh my God！真係死唔斷氣！」插水王未竟全功，只得苦笑一句，一邊擺好架式，準備迎戰下一回合。